III MIEJSCE: ADAM SKÓRKA /kl. Vb SP Pogwizdów/
„WIDZIOŁECH UTOPCA”
Jednego razu szełech razym z moim kómpanym Karłym do Czech. A
musicie to wiedzieć, że w Olzie, w Cieszynie miyszkoł kiesi
utopiec. Jo go nigdy wcześnij nie widzioł, ale tym razym mie to
dopadło...
Nó i tak to było. Idymy se z Karlikiem pomału kole tej rzyki,
idymy..., a z naprzeciwka idzie ku nom jakisi panoczek.
Łobleczony był po pańsku, toż my się na nim nie poznali, ale jak
już nas mijoł, to się tak podziwoł nóm w oczy, tak nas
zaświdrowoł tymi swoimi oczyskami, że się nóm jakosi zrobiło
dziwoko. Ale nic to, poszli my dalij. Za pore godzin wracomy z
tych Czech, idymy przez most i naroz – jak cosik nie pisknie pod
nami żałośnie. Karlik się podziwoł na dół z mostu – nic nie
widać, toż idymy dalij, ale za dwa kroki zaś – jak cosik nie
pisknie łokropecznie. Aż nóm gynsio skórka wylazła na rynce.
Zaglondómy zaś, a tam we wodzie cosik pływo – cosik jakby mały
zaiwniątek z dzieckiym. Kareł nic nie myśląc, skoczył do wody.
Płynie ku zawiniontku, płynie, a tu naroz – płynie za nim nasz
pieknie łobleczony panoczek; ino że mo jakosik bardziyj zielonóm
gymbe. Jak żech to uwidzioł, to żech zaczoł wrzeszczeć:
-Kareł, Kareł! Dej pozór! Utopiec cie goni!!!
W tym momencie zawinióntko znikło, a Kareł się obejrzoł i
pieronym zaczón płynąć ku mnie. A utopiec za nim. W ostatnij
chwili udało mi się wyciongnónć Karlika na brzyg. Utopiec
dopłynył do brzygu, ale my już stoli na ceście. Karłowi to
jednako nie dało spokoju i spytoł się tego utopca:
-Powiedz czymu żeś mie gonił, czego ci potrzeba? – zapytoł.
Utopiec jynknoł, sapnął i powiedzioł:
-Jak żech był młody, to moja starka piekła taki dobry brutwaniok
z żarnówki. Wiycie – jak go wycióngała z pieca, to tak wóniało...
Strasznie mi się ckni za takim brutwaniokiem prosto z
piekarszczoka i tak se myślym, że może kierysi chłop, co idzie
po moście, mo w taszce kónsek tego placka, toż sprawdzóm. Ale
jeszcze żodyn ni mioł!
Tak my już wiedzieli. Za pore dni, jak my zaś szli ku Olzie, już
my mieli w taszce moc wielki kawałek brutwanioka z żarnówki. I
od tego czasu utopiec stoł się naszym kamratym.
|